Дали 5G мрежата или Wi-Fi може да предизвикаат рак - од факти до заблуди
Кога ќе го пребараме на интернет терминот „рак“ ќе добиеме милиони резултати, од тоа што 5G мрежата е виновна за појавата на ракот до тоа што може да се лекува со сода бикарбона. Сепак, Интернетот не е секогаш сигурен извор на информации. Некои се корисни и точни, но има многу неточни што ги доведуваат луѓето во заблуда. Исто така, често е тешко да се разликува факт од фикција. Сè повеќе сме опкружени со лажни вести, лажни тврдења и недокажани теории кои изгледаат и звучат совршено веродостојно.
Дали 5G мрежата или Wi-Fi може да предизвикаат рак?
Научниците од Cancer Research UK, најголемата независна организација за истражување на ракот во светот, нагласуваат дека дезинформациите не се поткрепени со научни истражувања или докази. Ова дополнително може да доведе до непотребна загриженост и да влијае на одлуките на луѓето кога станува збор за превенција од рак, па дури и за лекување. Во оваа прилика научниот тим на оваа организација изјави дека на врвот на листата на најчесто поставувани прашања за ракот се и митовите за тоа дали 5G мрежата или Wi-Fi (безжичната мрежа) предизвикува рак.
Анализирајќи ги најдобрите научни докази, истражувачите велат дека нема добри објаснувања за тоа како 5G или Wi-Fi може да предизвикаат рак. Денес, има толку многу приказни дека мрежите 5G емитуваат радијација што може да ја оштети нашата ДНК и да предизвика рак. Кога станува збор за зрачењето, важно е количината на ослободена енергија. Високо-енергетското зрачење (често наречено јонизирачко зрачење), како што се УВ зраците од сонцето, ослободува доволно енергија за да ја оштети ДНК. Но, и 4G и 5G мрежите емитуваат радиофреквентно зрачење (радио бранови), кое е многу слабо, т.е. нејонизирачко. Тоа значи дека нема доволно енергија да ја оштети ДНК, па не постои директен начин да предизвика рак.
Милијарди луѓе користат мобилни телефони, но нема зголемување на 3 типа на рак
Мобилните телефони, телефонските столбови и Wi-Fi исто така се потпираат на истото нејонизирачко зрачење. Радио брановите произведени од Wi-Fi се дури и послаби од оние што ги произведуваат мобилните телефони, а на Интернет често се објавуваат текстови со алармантни наслови, кои се чини дека го поврзуваат зрачењето на мобилните телефони со ракот. Таа дезинформација често се заснова на студии спроведени на клетки или лабораториски глувци, кои користат многу повисоки дози на зрачење од оние што ги емитуваат мобилните телефони. Во таквите експерименти, клетките се изложени на овие високи дози многу подолго отколку што луѓето ги користат своите телефони во реалниот живот.
Истражувачите од Обединетото Кралство за истражување на ракот велат дека во текот на годините биле спроведени неколку големи студии на луѓе и не нашле јасен доказ дека мобилните телефони или Wi-Fi предизвикуваат рак. Како што истакнуваат, употребата на мобилни телефони е драстично зголемена во последните неколку децении, при што сега ги користат милијарди луѓе ширум светот, но нема значително зголемување на стапката на состојби како што се рак на мозокот, тироидна жлезда или рак на плунковните жлезди.
Со оглед на тоа што мрежите 5G и 4G, мобилните телефони и Wi-Fi сè уште се релативно нови технологии, во тек се бројни студии за да се анализираат долгорочните ефекти и да се обезбедат потребните докази. Засега нема научен доказ дека 5G мрежата или Wi-Fi предизвикуваат рак, според експертите на Cancer Research UK.
