Дали е вистина дека луѓето се поискрени кога пијат?
„In vino veritas“ или во превод „Во виното е вистината“ е стара латинска поговорка која ја поттикнува идејата дека алкохолот има некаква улога во серумот на вистината. Слични поговорки има и во други народи и култури. „Што мисли трезен, пијан вели“. Но, дали е вистина дека луѓето се поискрени кога пијат? Научниците велат дека одговорот е и да и не, пишува LiveScience.
– Алкохолот ни олеснува да го кажеме она што ни е на ум. Во некои случаи ова може да биде вистина. Во други, тоа може да биде само она што некој мисли дека е вистина во пијана состојба, изјави Арон Вајт, водач на Националниот институт за злоупотреба на алкохол и алкохолизам, за LiveScience.
Дефинитивно има поголеми шанси некој да го каже своето мислење по неколку пијачки. Но, постои и шанса да каже нешто што му изгледа реално додека е пијан, но не би го сфатил сериозно трезен. На пример, пијаните пријатели може да ветат дека ќе се преселат во друг град или ќе ја напуштат работата, но наутро се повлекуваат.
Студијата од 2017 година објавена во Clinical Psychological Science покажа дека луѓето се однесуваат поекстровертно по неколку пијалоци.
– Во принцип, откривме дека алкохолот ги засилува нашите емоции. Може да се случи повеќе да се смееме, да зборуваме погласно, но има и поголеми шанси да си туриме солзи во пивото за време на непријатни ситуации – изјави за LiveScience Мајкл Сајет, професор по психологија на Универзитетот во Питсбург.
Тие засилени емоции можат да доведат некого да каже што мисли кога е трезен, но исто така го става човекот во чудна состојба каде што може да каже нешто што не го мисли, а потоа да зажали за тоа. Тоа е како алкохолот да ги тера луѓето да станат понасилни или да се коцкаат, што можеби се дејствија за кои понекогаш размислуваат кога се трезни, но се нешто што би го избегнале.
– Бидејќи алкохолот ги менува мислите и чувствата, не е изненадување што ваквото однесување се менува. Алкохолот може да го доведе нашето однесување до крајности – изјави Сајет.
Овие ефекти се должат на фактот дека алкохолот предизвикува дезинхибиција, што значи дека лицето има поголема веројатност да дејствува импулсивно. Ова се случува затоа што алкохолот ги намалува сигналите во делот од мозокот кој го регулира однесувањето и ги контролира импулсите, објасни Вајт.
Алкохолот, исто така, ја потиснува амигдалата, структура во мозокот позната по тоа што предизвикува страв и анксиозност. Додека некое лице е трезно, амигдалата испраќа предупредувачки знаци за да го спречи да прави работи што може да бидат опасни, но тие предупредувачки знаци се премолчуваат по неколку пијачки.
Дали има вистина во поговорката дека „има вистина во виното“? Да, луѓето можат полесно да откријат тајна, но и нешто за што ќе зажалат. Ефектите на алкохолот се премногу комплицирани за да имаат црно-бел ефект врз искреноста.
– Алкохолот не е серум на вистината. Тоа е сигурно – изјави Вајт.
