Предводен од Кристофер Мејсон, професор по физиологија на Weill Cornell Medicine во Њујорк, тим од истражувачи испита како имунолошкиот систем реагира на вселенски летови кај двајца мажи и две жени кои летаа околу Земјата како цивили во мисијата SpaceX Inspiration4 во 2021 година и споредија наодите на податоци за 64 други астронаути.

Студијата покажа дека активноста на гените е повеќе нарушена кај мажите отколку кај жените и дека е потребно подолго време за да се врати во нормала кај мажите кога ќе се вратат на Земјата.

Еден протеин кој бил засегнат бил фибриногенот, кој е клучен за згрутчување на крвта, пишува Гардијан.

– Досегашните собрани податоци укажуваат дека регулаторниот и имунолошки одговор на гените на летот во вселената е почувствителен кај мажите – заклучија научниците во студијата објавена во списанието Nature Communications.

Научниците истакнаа дека откритието може да влијае на изборот на екипажот, односно дека следните мисии би можеле да опфатат поголем број женски астронаути. Не е јасно зошто жените би можеле да бидат поотпорни на вселенски летови од мажите, но Мејсон рече дека можноста да се справи со барањата на бременоста може да помогне.

„Способноста да се толерираат големи промени во физиологијата и динамиката на течности може да биде одлична за управување со бременоста, но и за управување со стресот од вселенските летови на физиолошко ниво“, рече тој.