Деца родени глуви, примале инјекции и сега слушаат нормално
Пет деца кои се родени глуви сега можат да слушаат на двете уши откако учествувале во неверојатна генска терапија. Ова тестирање за генска терапија дава голема надеж за идни третмани.
Децата не можеа да слушаат поради вродена генетска мутација која ја нарушува способноста на телото да направи протеин потребен за да се осигура дека звучните сигнали непречено патуваат од увото до мозокот.
Лекарите од Универзитетот Фудан во Шангај ги лекувале децата кои биле на возраст од една до 11 години. Идејата беше да се третираат двете уши со надеж дека децата ќе развијат доволно слух за да можат да учествуваат во разговорите и да разберат од која насока доаѓа звукот.
За неколку недели од почетокот на генската терапија, децата можеа да слушаат, да го лоцираат изворот на звукот и да препознаат говор во бучна средина. Две деца дури биле снимени како танцуваат на музика, според студијата објавена во Nature Medicine.
Д-р Женг-Ји Чен, научник од болницата за очи и уши во Масачусетс на Харвард и еден од водачите на клиничкото испитување, рече дека резултатите биле неверојатни и експертите продолжиле да забележуваат како слухот на децата драстично се подобрил.
Терапијата користи неактивен вирус за „криумчарење“ на работни копии од засегнатиот ген, наречен Otof, во средното уво. Откако ќе влезат внатре, клетките го користат новиот генетски материјал како образец за да направат работни копии на клучниот протеин – отоферлин.
Видеата објавени од тимот покажуваат дека по три недели терапија, двегодишното момче реагира на звуци и танцува на музика, додека не реагирало на ништо пред да ги прими инјекциите.
Друга пациентка, тригодишно девојче, не реагирала на звук пред терапијата, сега разбира реченици и изговара некои зборови.
Најстарата пациентка, 11-годишно девојче, не реагирала на тоновите пред терапијата, но по само шест недели реагирала на сите овие тонови и од 13-та недела учествувала во говорна обука.
Повеќе од 430 милиони луѓе на планетата имаат оштетен слух, а околу 26 милиони луѓе се глуви од раѓање. Кај околу 60 проценти од децата причината за тоа е генетски фактор.
