Во март, Брисел побара од Bing, заедно со неколку големи дигитални платформи, вклучувајќи ги Google Search, TikTok и YouTube, да обезбеди информации за активностите што ги презеле за да ги ублажат ризиците од користење на вештачка интелигенција. Но, Мајкрософт не одговори на барањето за повеќе детали за „специфичните ризици кои произлегуваат од функциите на генеративната вештачка интелигенција на Бинг, особено „Copilot in Bing“ и „Image Creator by Designer“, соопшти Европската комисија.

Американскиот технолошки гигант сега има рок до 27 мај да достави „внатрешни документи и податоци“.

Доколку Мајкрософт не го стори тоа, ЕУ може да изрече казни до еден процент од вкупниот годишен приход или глобалниот промет на компанијата, како и периодични казни до пет проценти од просечниот дневен приход или дневен промет во светот. Од минатата година, најголемите светски технолошки компании мораа да се усогласат со законот на Европската унија познат како Закон за дигитални услуги (DSA). Комисијата соопшти дека се сомнева дека „Бинг можеби ја прекршил DSA“ во делот поврзан со „ризиците поврзани со генеративната вештачка интелигенција“. Ова се однесува на можностите на вештачката интелигенција да обезбедува лажни информации и „вирусно ширење на длабока лажна содржина“.

Мајкрософт соопшти дека е посветен на исполнување на барањето на комисијата.

„Целосно соработуваме со Европската комисија во рамките на Доброволното барање за информации и остануваме посветени да одговориме на нивните прашања и да споделуваме информации за нашиот пристап кон дигиталната безбедност и усогласеноста со DSA“, рече портпаролот на Microsoft.

Портпаролот рече дека Мајкрософт презел „чекори за мерење и ублажување на потенцијалните ризици“ на сите негови платформи.

Мајкрософт инвестираше милијарди во OpenAI, главен играч во областа на вештачката интелигенција, особено откако четботот ChatGPT се појави кон крајот на 2022 година.