Зошто политиката го разбудува најлошото кај нас?
Доволно е да отидете на која било социјална мрежа, да вклучите телевизија или да пуштите поткаст и лесно е да најдете примери на лицемерие и страшно однесување во политичкиот дискурс. Истражувачите од Универзитетот во Небраска во Линколн (UNL) мислат дека откриле зошто, рече UNL.
Резултатите од студијата со необичен наслов „Политиката нè претвора во копилиња: Зошто моралната пресуда зависи од политичката ситуација“ објавена во Политичка физиологија, ја демонстрира подготвеноста на луѓето да ги прекршат сопствените морални правила, па дури и да се однесуваат неморално, кога се вклучени во политичката сфера. Истражувањето го направија Кајл Хал, Кевин Смит и Клариса Ворен.
Резултатите, наведуваат тие, сугерираат дека непријателството кон друга група, како што е спротивната страна, е двигател на моралната флуидност кога се преминува од личната на политичката арена.
И никогаш не е виновна само едната страна.
Неморал во политичката сфера
– Луѓето, без разлика на возраста и идеологијата, се поспремни да се однесуваат неморално и да ги судат другите доколку тоа се случи во политичката сфера. А тоа во голема мера предизвикува искрено внатрешно непријателство кон другата страна – вели Хал, професор по политички науки.
Истражувачите развија прашалник и анкетираа четири различни групи возрасни, вкупно 2.472 луѓе. Го мереа неполитичкото и политичкото однесување во однос на моралните правила и неполитичката и политичката толеранција кон другите.
– Во суштина, го земавме истиот човек и му ги поставувавме истите прашања. Единствената разлика беше што го сменивме поимот личност во политичар. И тоа беше доволно за да се промени моралното расудување на луѓето. Доволно се промени што моралните судови одеднаш да станат флексибилни – изјави Смит, професор по политички науки.
Ова вклучуваше проценка на лошото однесување на самите политичари. Авторите откриле дека луѓето се морално потолерантни кон политичарите што им се допаѓаат, исто како што се подготвени да толерираат повеќе од пријателите. Во сè пополаризирано, често токсично политичко опкружување, истражувачите велат дека резултатите ја нагласуваат штетата од незадоволството во политиката.
– Има причина за загриженост. Сè додека чувствува внатрешно непријателство кон друга група, постои ризик затоа што луѓето се подготвени да се однесуваат неморално. Политиката не принудува да правиме работи што вообичаено не би ги направиле и да толерираме работи што вообичаено не би ги толерирале. Таа понекогаш го вади најлошото кај нас. Начинот на кој некои политичари и медиуми зборуваат за друга партија или страна го разгорува тој оган. Колку повеќе се вклучуваме во гледањето на оваа или онаа партија како лоши момци, толку повеќе се чувствуваме подготвени да го игнорираме сопствениот морал – изјави Хал.
„Тоа не претвора во копилиња“
Истражувањето е продолжение на работата на Смит за тоа како политичката активност и идеологијата влијаат на моралните вредности и избори, а не обратно.
– Ако е тоа вистина, тогаш луѓето имаат различни морални стандарди во личниот и политичкиот живот. И тоа е она што го откривме. Не е дека политиката нè претвора во копилиња ако сме леви или десни, ако сме млади или стари, ако сме богати или сиромашни, туку едноставно сите нè претвора во копилиња – рече Смит.
