Какви се условите за сместување во Штип, каде престојуваш ти?

• Моментално престојувам во Штип, бидејќи имаме повеќе обврски овде во Штип и покрај тоа што предавањата се онлајн. Престојувам во државен студентски дом. Условите се такви какви што се, меѓутоа мислам дека многу луѓе ги претставуваат на погрешен начин, бидејќи не е сè толку катастрофално, особено во нашиот студентски дом. Има солидни услови и во однос на средствата коишто ги резервираме за сместување, условите се навстина добри.

Опиши го животот во студентскиот дом, дали живеете по повеќе студенти во една соба или сте сместени по повеќе студенти во една соба, опиши ни ги условите.

• По соба се случува, односно најчесто сме сместени по четворица. Просторот е помал, но сепак добро се снаоѓаме. Со добра организација може да функционираме. Исто така храната не е толку лоша, туку напротив е особено добра, бидејќи имаме готвена храна, а тоа е огромен плус за нас бидејќи не мораме сами да готвиме, да мислиме и на тоа и имаме повеќе време на располагање. Се случува да има потреба и од дополнително нешто, па и во собите си приготвуваме нешто дополнително.

Кои се предностите, а кои недостатоците на живеењето во студентски дом?

• Како што споменав предност е храната, потоа сметам дека социјализацијата особено како важен фактор во нашите животи како млади личности, тука е на многу подобрo ниво. Се запознаваш со најразлични луѓе, карактери, има многу дружби, меѓусебно си помагаме. Интересно е кога се запознаваш со личности од други градови.

Како е да живееш со луѓе кои претходно не си ги познавала?

• На почетокот особено стравував и бев скептична околу тоа дека ќе живеам со нови личности, но кога дојдов тука всушност бев многу пријатно изненадена. Можеш многу лесно да се вклопиш, не мора да значи дека со некој не се познаваш нема да функционираш одлично. Некогаш може да е сосема спротивно. Има многу почит, разбирање, си помагаме меѓу себе и некогаш не се ни чувствува таа празнина дека сме одделени од дома. Едноставно како да се надополнува тој недостаток.

Кои се твоите планови за во иднина, дали ја гледаш својата иднина тука или можеби во странство?

• Како и секој човек, така и јас имам идеја и желба во однос на иднината, кои се стремам да ги остварам. Во моментов особено ми се интересни лабoраториските вежби и би сакала и моето идно работно место да е поврзанo со тоа. Во однос на тоа дали својата иднина ја гледам во Македонија или надвор од неа, немам размислувано, бидејќи не знаеме што ни носи иднината.

Што би им порачала на идните студенти, на оние кои планираат да се запишат на твојот факултет?

• Иако нашата струка можеби не е до толку развиена, многу луѓе не ни знаат што значи нашата струка и која е важноста. Особено тоа што фармацевтите се последните во ланецот на здравствените работници и заземаат особено важно место во здравствениот систем. Мислам дека секој којшто е љубител на природните науки дека би се пронашол во истото. Треба многу трпение и труд, но со упорност мислам дека сè е возможно.